• likhtasaurabh 6w

    Zulfe

    Tumhare liye vo sirf zulfe hai
    Mere liye koi 800 panno ki kitaab
    Jitne us kitaab me harf hai
    Unse zyada un zulfo me chupe ishare hai

    Aaj vo gesu bandhe hai
    Matlab ya to so Kar uthi hu
    Ya mood hai kharaab
    Ya vo vali baat hai...
    Vahi, tumhe pata to hai

    Aaj vo zulfe khuli hai
    Yaani aaj tum Khush ho
    Aur agar vo reshe Hawa ke saath
    Kahi ud rahe hai
    To khush ke saath azaad bhi ho

    Mushkil padhne me tab aa jaati hai
    Jab bandhe baalo me se
    Kuch gustaakh maathe par nikal Aate hai
    Inka Matlab mujhse Milne ki khusi hai
    Ya na mil pane ki shikayat
    Ya ye yu hi hai,
    Bas Bina vajah
    Samajh nahi aata

    Accha ek baat aur,
    Inhi maathe pe aate kuch baalo ko rokne ko,
    Jab tum vo butterfly clip lagati ho,
    kasam se bilkul masoom bacchi Nazar aati ho
    Jaisa vo taj Mahal vali pic me lagi thi,
    Jab tum 8 saal ki thi,
    Vo roki Hui zulfe,
    Vo masoom chehra,
    Mera din bana jata hai

    Qayamat tab aati hai,
    Jab mere aate hi tum un khuli zulfo ko
    Baandhne ki saazish karti ho
    Hotho me vo kala rubber band daba Kar,
    Mujhe dekhti ho
    Kabhi lagta hai ye harkat hai,
    Suno, Zara idhar dekho, kehne ki
    Kabhi lagta hai, Bata rahi ho
    Meri zulfe aur Mera sab
    Kisi aur ke liye hai,
    An tumhare liye nahi....

    Jo bhi ho, bas itna sa kehna tha,
    Mujhe lambe Baal pasand hai,
    To tum unhe Kabhi katvana nahi,
    Accha thik hai, mere liye na sahi,
    Apne liye, inhe aise hi rehne Dena,
    Varna lagega, ye zaalim zamana
    Tumhari azaadi
    Tumhari abhivyakti
    Tumhari awaaz
    Tumse cheenne me kamyaab ho Gaya