Grid View
List View
  • meteitoulietalie 5w

    Tenyidie Kephrünuo Krotho (TKK)
    Ura Academy (2021-2022)


    President - Meteitoulie Talie
    Vice President - Keneizenuo Solo
    General Secretary - Ruokuozenuo Sote
    Assistant G.S. - Silievi Kehie
    Social & Culture Secy. -Neinguphreü Mere
    Asst. Social&Culture Secy. - Mengulhounuo Kire
    Literary & Magazine Secy. . - Vimezo Keyho
    Asst. Literary&Magazine Secy. - Neikecüü Suokhrie
    Treasure. - Kekhriezonuo Celine Mere
    Publicity & Information - Khrieketoulie Chadi
    Statistical Secy. - Victor

    Advisor :-
    1. Dr. Shürhozelie Liezietsu
    2. Kikruneinuo Liezietsu
    3. Dr. Khrüvolü Keyho

  • meteitoulietalie 10w

    Mhakejüe u medo dukhri

    Tsieteiu nu mhakejü miapuoe puo tsopfhü mu puo kere kimhie cü kropuo ze kese baya sikecü ketsau mu Nganuo u nie rüchü nunu thakeshü.

    Nganuo : Apfutsa.. apfutsa..
    Ketsau : Whe-i kedipuo üya shi?
    Nganuo : Mhacha tseiliete parlie avu mhacütatuo a we merü bate.
    Ketsau :(puo zanuo-u kinu ba di) yha oh mhachalie tasiesü mhacülie morosuote, cho siro a latieho ler ketheguo seliete, nieko pete shürho zhülie..
    Zanuo-u : welo mucü dzüle krie di kehou keba ze nie bu vor rei u vie cükenyü cü chüya zoho ohh derei siesü norei pa shürho zhülie.
    Ketsau : ohh situo mu.
    Ketsau : Nganuo mi separ a cha va shü, kezie nu badi tuo parcü a mhi zeiboute, ketsau tuo kinu le balie mu
    Nganuo : Apfutsa thie hieko khadou ker(10) ko kephrükelie hievihiesuo parte mu a rei parliete,
    Ketsau : yha u neithorte a nuo no n mhatho chükhriekelie a neithorlie Jihova tshe derei avu cüsie kedipuo pie n leshüki mezatie shi! ayah n nou chü pesuoshü khrielie derei mhakejü sü u medo dukhrilie ha, a nuo tsiedo sü leshüki kesa nu voketuo sü raka kekra se morosuote avu kira nu süko meza tsolietuo mu ha,
    Nganuo : Apfutsa a a mhatho chü khriekelie se nki pushü ro no n neilie tuo nhie ru n bu a la nou kemezhie la bate a kejote, derei süko khawata tsiezhü amei uko thevü kecü yopuo teshülie avu bu chacü nu di süla a chapie bawate khe avu mhacütatuo,
    Ketsau : Huu kide avu va rükra si bayashi nmei uko ha, khe sie kecha chülie di cütatuo.
    Ketsau : Nganuo simonyü sukropuo avu kitie kerüchü phizhü sü?
    Nganuo : Pastor uko meliete apfutsa, uko pa Kepethau Khrielhou uko kinu kechachütuo zhie mecie, apfutsa kidi kehou liethoko teisoteizei kepethau uko kinu vo kecha chü sei baya, mu avu kinu we vorya mo shi? Kepethau uko raka pie liethomiako zha khrü se baya me? A we kehou liethomia kecha menguthor bayale apfutsa avu rei tsiezhü we pa uko zha khrü zeler uko bu avu kinu kecha rei chüshü ro kimhie? Uko zha kide ya shi? Raka ba kemola u kinu rei vorya mo meciete ha.
    Ketsau : Anganuo kechakechü sü puoma chüya molie, no haa...
    Nganuo : Sie kedipuo la avu kinu we vorya moto shi?( Puo thuo puo nou nu le di mhakejümia rei kecha mengu baya cü siya monhie ha) oh derei apfutsa a zepfü Rokokhoü rei hieko keze rühe (pass) phreliete sicü puo nia mu puo nieo uko puo keseshü di puo bu vo daru chatsa phrütatuo zhie shie, ayah a rei kidepuorei sükemhie cü phrünyü shi,
    Ketsau : N zepfü uko we mhanyi mo ürei mia siezedzürie vithorlie derei avu sü avu kelhou rübei, mhakejü sü se u mezhü chü di avu rei avu siezedzüriemiako meholie ya mo sükize avu kepenuothoko rei avu meholie mote derei a nuo mhasilie mu mhanyilie siesü mia pete rei u siezedzürie mhietaya zo.
    Nganuo : Ulie apfutsa mhasi mu kinyi ba moro mia u saphrü motayale ha. Simonyü ndu a nia uko ki khronu baya cüu kedipuo kesuo chü badi siate mu?
    Ketsau : Puorei sorkari lietho chüya puo mhatho rüü phiya mecie puo mhatho nu vo phiya mo, siro puo keza(kaza) rei vi se mecielie dopuo nu mhanyi pie sikemo chü vote derei tsiuva puo kesuo hau daru puoma kerethoko se, mu puo ze thechü lukihaki vo puo meho derei puo kechü cau telie mote shie süla puoze ura vorte zha huoyo we viza lacü mhie phirtelie ru puo kechüu hielie reta meciete sü ndu. Mia sè sie nu miatha miamele bacü sü vimo derei puo dze sicü ketsamia mezako rei bie cüya üdi mia puyalie süu rübei zokemo rüna nu lieciemiako kekhruhi kevorko rei meza cüya üdi pu anuo no we dietholie morosuo ho.
    Nganuo : ohh! Simonyü apfutsa kikemhie di krütamia kedaya ga?
    Ketsau : Krütamia sü diethomiatho, pehüpeyu nyi, kemenuomia, thetou nu mhachü ya cümia kedapie krüta chüya derei tsiedo nuomia hako medzituoya mote.
    Nganuo : Derei apfutsa tsiedo sü mha pete rüditelie sicü thiedzü zho süko se seituolie lho mecielie, krüta chüdi u kinyi rei keselie motasie mia u tha u mele tatuole tsiedo we. Apfutsa thiedzü sü leshüki baya mo site mu sie no kirapuo nu mhasilie ga?
    Ketsau : Thiedzü sü leshüki baya mo derei thehouba, sidi ketsie pfhepie theba chüpie baya sügei badi phichümia die rünyü isikelie geinu thedzethese mu kelhouzho kevi mhasiko silie sidi keyie setuo yalie. Derei tsiedo nuoko kemeduonya sedi mhasi selie tazhie zo, derei u kelhouzho keviko kha phrewata zhie, phichümia kinu mhasi ketho-u ngulie yaho.
    Nganuo : Kethole apfutsa kijü nu sü u krü ki mhakesi jü zolie, a puo a zuo unie rei n mhie mhasi se zonhie? A we u nie bu rei rhei ba di a petha seituo nyülie derei a krü dze simote.
    Ketsau : Anganuo n penuokelie mhodzü n puo suo pecha se vor di siate siro n ngukelie sie zhadoudo kenie mese balie di n zuo rei puotei vote, avu...........n bu rünoumo. Mhakejü sü kecüca puotou se puo tsülie mo, kechükinu vo morokesuoko rei meholie mo di puo burei lhou pedzewate.
    Nganuo : Kedipuo la apuo azuo unie zevo kechüki nunu meholie modi sita? siro no raka jüro huomia n khruhi rei shücü ngulie mo me? unie ze vo meholie ücü we a rei thie a zepfü mhie a puo a zuo zakie ba zotuo mu ru,
    Ketsau : Ule anganuo mha hako pete a thachü late derei raka kejü sü kikemhie di bagei zha khrü ze kechü kinu volieta daru ma kejüu zo monyü bagei zha rei jü hiesiehieruo sü kilietuo mu meholie kezhüko rei meholie mote, Anganuo n bu n puo n zuo zakie mote süla a rei n ngu pie rünoumo situoya, Anganuo n bu merünuo chüte a rei a nou kerüü tuo mota derei no hayo rei pekrupie avie chükeshü ha a a neithor siro n rübei ha a dzüzie kechü zote süla a n za thopie Dzüziengunuo chüshü ho.
    Tseite.
    ©meteitoulietalie

  • meteitoulietalie 11w

    VITSEITUOLIE YIESE

    Vitseituolie Yiese themia hau themia puodzü kezie semiapuo, khunhie rei mia neikemo chüya chiemo, puotei pete nu nyü zazai mia dzüva pezie seituo tsoya. Puoe shürho shürhei mu themia kemenuo sepuo we. Puo kelhou nunu puo dze a keneitho puo ngulie mu süu hamhie:-

    A Vitseituolie a khadou ker(class 10) nu kebaki khunhie a leshüki nu vo modi tsu rühoutuota sünhie hieko leshükinu kephrünuomia kethu-u (General Secratary) kedatuoüta süla a zemiakoe a pesi modi a za khashüwa, sünhienu vor thedzeu silie di arei a ngose mu mengarei cümhie a thuo a nounu a rüchü di a kimhie di mia mhodzü nu siethalie di mhapulieta morei a kimhie di kephrünuomia mezhü se vo kepethamiako ze kezalieta mha hako le di a nou kehoukeruo chü bata derei latsapuo we a neipfü dze lelashü di tsiewe a thepie pfüliete ru vo puoze kerüchülie vite isidi a nei bata. A kedapie kephrünuoko kethu-u chükelie khrüpuo mese parliete tsiewe a nourei thepfu zaliete u zemiako u rhute, khadou kerünuo nu kebako tsiewe ukie di kepethau isite, mhakekra a la resezo derei mhakekra si kehielie bate, khunhie a khadou ba mecüta süla azeu ki pushüru puorei hanie kemhietouta süla hanie khadou nu ba modi vo kitie rühoutuo sitse hanie thuo kerüchü badi simorei vo nko leshüki kiluomhoya(Ceiling) gei mepfhi kecü mu tsiekhrienuo kebakoyo bielietuo sidi azeu ketsoshü ru puorei puo neita süla hanie keze mia class ze kebateiu nu pesikuoi di hanie keze kiluomhayo(ceiling) gei pfülie, khadou huo mese nu vo ceiling kerüpha shüdi u zemia huo nguro süko zakie shüshü mu rüümia u kenei huo nguro süko medophishüshü di ceiling gei mhapfhü vozhü azeu aki pudi vo lugei tsiekhrienuo yopuo kru ngu bate sita süla hanie keze süu whuovozhü tse hieko kepethako office mesetou nunu ceiling kedephalieta sidi teler, arei rükri a rhiechü vo sei puo pephi phir kebau mezalie sei süu gei khepfü zhate mu sidi ke kijü mehoshü ru kepethako pete u banu ba a mehodi tv kemehotuoi bata a ziejüthorlie cü tala ceiling gei pfütaketuola a rhiechü dojü derei a bounyüthorta sidi palie kenjiite, kepethako huomia a kerhie huomia lelie moto cümhie huomia a kre isi bate arei a mhogei mhie zhate mengathorlie cü. Sei gei khepfü zha a bounyüthor vorta sie hieko kepethamiapuo a kerhie parta derei a kepethau ki kepethau n thuo a kerhie sewata zorei vi derei a bounyüthor zhatelie süla n bau sephir a tsüshü di abu kijü kertacie süzenu n thuo puketuoko puwata isishü ru puorei rükrei puo bau sephir a tsüshü a süu kedelie di kijü kerte, ker thalie mu kepethau a kerhie pie mhapuo chüwate derei puo kedipuopuo pupie a kerhie basi süko rei letsolie mote mengathorwata cü. Teisozha hanhie zhate a mhahau le di mengasei ba tso mu sünhie yawi nu a zeko a za thopie DOPHI chüwate mu thie ketso aza süu setuoya zo.


    TSEITE.
    ©meteitoulietalie

  • meteitoulietalie 12w

    Sievü

    Sievü nie we lhou kide zivi,
    Rüyakemo supuo nyituo mu?
    Menyiepounuo zivitho nhie ru,
    Sievü rüli hienoumvü kuolie,
    Phrashü tie rei nie thesuo chükhrie,
    Kevie zo se hie ketshu chü pfü,
    Nou pete se nie rüli rükra,
    Nyüzai shüshü nie kengu metsi,
    Petse nu rei rürei nie meho,
    Nie rüli le noumvü phiya rei,
    Mhotsu zowe nie peralie re,
    Zetsu lu gei nie pema ya ro,
    Nounyü die pu kekrakelho tie,
    Mia ra vi rei a ra a neikuo.
    Mia ra modi ura tuothienyü.
    ©meteitoulietalie

  • meteitoulietalie 15w

    Ukrü die

    Apuo azuo die keyie zo se,
    Shüphrü chanu a phiyha shümvü,
    Kechachie se phrüzo thenyüshie,
    Shüphrü teiko ngumecütuo ru,
    Ukrü die sü thie rükra kesa,
    "Shüphrü teisü dopuo rübei zo''
    iketuo sü kethokhrü yalie,
    Kedichie nu vo mhate shi ha?
    ©meteitoulietalie

  • meteitoulietalie 17w

    HAMOLIE

    HAMOLIE sü tenyimia dierhe,
    HAMOLIE sü kejo valiete,
    HAMOLIE sü kethezie ketsü,
    HAMOLIE sü u krü sieso-u,
    HAMOLIE sü kide rünyü vi,
    Tenyimiako HAMO sü tsite,
    HAMOLIE tha u vie mia viete,
    HAMOLIE chü mia khrükhro tuote,
    HAMOLIE pu u meziemelote,
    HAMOLIE ba u tha jütazie,
    HAMOLIE se mia krenyü chüte,
    HAMOLIE mu mia u mecüte,
    HAMOLIE ze mia u peserei,
    HAMOLIE bu n penyüwahie.
    HAMOLIE sü tenyimia die zo.
    Chülie re ho rei HAMOLIE zo.
    N lhotelie rei HAMOLIE ze.
    ©meteitoulietalie

  • meteitoulietalie 17w

    'NO'

    Kijü kelhou ha-u leshü ro,
    Themia zo we rüvemia zolie,
    Zha huoyo zo u kelhou tei sü,
    Miphra kevi sia jüta tolo,
    Chüu rietatie ba pecha lho mu,
    Kengukemvü u donu shühie,
    Kemehou la n thuo n sehie,
    N mengu la n perhuwahie,
    Thetshe pfhü di therhu melie hie,
    Kralie mo di ramei mehou hie,
    Krüta üdi thetha krawahie,
    Mia vie üse mia vie üzolie,
    Kesia preihie teigei vonyü ro.
    ©meteitoulietalie

  • meteitoulietalie 19w

    SE ZHA

    Kenyimia se khrü themvü kizha,
    Kejümia se teikezei rükri.
    ©meteitoulietalie

  • meteitoulietalie 20w

    N RÜBEI

    1. Khriesarüü sü u noukemvü ha le
    U neimia rei rükra sei banyü
    Nie za zorei ala puomare
    Zivi pete sü n vie zolie.

    # No we jü ro hiewe hie rübei
    N rübei zo a nei ketho sü
    Vapuo rübei nie ze khrietho chü
    Zotuo üro le rünou mozo.

    2. Apuo azuo die keyie shü khrie
    U neimia mu peja shülie suo
    N khiera nu khunhie khunhie mhie
    Le kemo nu pevowa tolo.

    3. Kelhou zha we vo mhatayale
    Phichü zhawe therhielie re ho
    Kijüu thuo rüdita zorei
    N kekhrie we rüdita monhie.?
    ©meteitoulietalie

  • meteitoulietalie 20w

    Peteneinuo Suohu

    Khunhie zharei hie die keyie khrie,
    Kikru taze kevi chanu shü,
    N kelhou se zhapu kevi chü,
    Kikru donu mitu puo kemhie,
    Pete nei chü n za kheki ze,
    Nousuo simo hie dzüva pezie,
    Keba teiko le rünou molie.
    Dichie nu rei hiekho teluo shi.
    Rünoukemo Peteneinuo no,
    N kelhou zha teisü keyu mhie,
    Dopuo rübei kikru dzüzie chü,
    N kelhou dze le hie ruo tharei,
    Hako pete Jihova medo,
    Kijü hanu kese motarei,
    Khunhie zo vo lu-u teigei nu,
    Kezelhou la u nei phiketuo,
    Rükra la shü hie nou luoya ho.

    ©meteitoulietalie