• sahildandeliya 10w

    Ye Gham Kya Dil Ki Aadat Hai! Nahi To
    Kisi Se Kuch Shikaayat Hai! Nahi To,

    Hai Woh Ek Khwaab-E-Be-Taabeer
    Bhula Dene Ki Neeyat Hai! Nahi To,

    Kisi Ke Bin, Kisi Ki Yaad Ke Bin
    Jiye Jaane Ki Himmat Hai! Nahi To,

    Kisi Soorat Bhi Dil Lagta Nahi! Haan,
    To Kuch Din Se Yeh Haalat Hai! Nahi To,

    Tujhe Jisne Kahi Ka Bhi Na Rakhkha
    Woh Ek Zaati Si Wehshat Hai! Nahi To,

    Tere Is Haal Par Hai Sab Ko Hairat
    Tujhe Bhi Is Pe Hairat Hai! Nahi To,

    Hum-Aahangi Nahi Duniya Se Teri
    Tujhe Is Par Nadaamat Hai! Nahi To,

    Hua Jo Kuch Yehi Maqsoom Tha Kya!
    Yehi Saari Hikaayat Hai! Nahi To,

    Azeeyat-Naak Ummeedon Se Tujh Ko
    Amaan Paaney Ki Hasrat Hai! Nahi To,

    Tu Rehta Hai Khayaal-O-Khwaab Mein Gum
    To Is Ki Wajha Fursat Hai! Nahi To,

    Wahaan Waalon Se Hai Itni Mohabbat
    Yahaan Waalon Se Nafrat Hai! Nahi To,

    Sabab Jo Is Judaai Ka Bana Hai
    Wo Mujh Se Khubsurat Hai! Nahi To,
    ©sahildandeliya