• shrutitripathi 10w

    AAYINA

    Mere aur mujhme kuch faasle hai...
    Uss faasle ko mitaane ka faisla liya bhi tha maine,
    Magar har baar meri mulaquaat ek aayine se hoti hai,
    Jo mujhse meri shikayat karti hai.

    Uss aayine ke mutabik main ek insaan toh hun, magar jhutha.
    Jo Bahar se ek khushiyon ka makan hai,
    Lekin andar se bikhra aur toota...
    Jo duniya mein duniya walo ke liye khush toh hai,
    Magar khud se hamesha rahe rootha,
    Jo sabke saath khada toh hai,
    Par khud ka saath hai chhuta...

    Aayine ki itni baaton ko sunn maine kadam pichhe karna chaha,
    Kyuki khud se khud ki shikayatein sunne ki himmat mujhme kaha..
    Aur shayad isliye vo aayina mujh par hansta hai,
    Uske hisaab se mera dil bada sasta hai...
    Kyuki iss dil ke kamro mein jagah sabki hai...
    Koi chhod kar chala jaaye toh kya, darwazein toh aaj bhi khuli hai.

    Maine yahi baatein aayine ko bhi samjhaya,
    Apne aap ko sahi saabit karne ke liye saare wajaho ko bhi bataya...
    Mere pass kuch aur bhi baatein batane ko thi magar itne mein voh aayina phir hans kar kehta hai ki...jhuthi kahaaniyan bhi achhe se sunane aati hai mujhe..

    Ab uss aayine ka guroor kam hua,
    Usne meri hi parchhayi ko mujhse dur karte kaha...

    "Yeh kya har waqt fizool si baatein sunate ho...?
    Main tumhari hi parchhayi hun, aur tum mujhse asliyat chhupate ho..?!
    Har subah logo ko zindagi ka matlab aur na jaane kya kya batate ho....
    Aur har raat zindagi jeene ki bhukh mein jiye chale jaate ho!
    Inn aankhon ki chamak se tumne na jaane kitno ko galat fehmi mein rakha hoga..
    Aasuon ke samudra mein kyu nahi le jaate...?

    Unchaiyon ko chhune ki kahaaniyan toh bahot sunaayi hai,
    Kyun? gehrayi mein dubne se ghabraate ho..?!
    Khud ki kahaani toh padhi nahi jaati,
    Aur panno ko palat, har dinn nayi kalam uthaate ho..

    Zindagi mein kab, kyu aur kaise saamna karna hai yeh logo ko bata diya tumne...
    Suna hai, khud ke liye aaj bhi talwar uthane se darr lagta hai tumhe!
    Arey! Apni kahaani padhne ki himmat aayi nahi tum mein,
    Aur kavitaon mein khud ko bayan karte chale jaate ho...

    Har raat zindagi se haar..
    Agli subah nayi zindagi ki talaash karte ho!"

    Itna kuch sunne ki himmat nahi hoti hai mujhme,
    Isliye uss aayine ko khud hi todne ka mann karta hai..
    Magar ek baat hai jo mujhe aisa karne se rokti hai.. 'aayine se kaanch banne mein waqt hi kitna lagta hai..'

    Aur phir, ajeeb se bikhre muskurahat ko chehre par sajate hue yeh kadam pichhe chale jaate hai,
    Mere aur mujhme kuch faasle hai...
    Jo shayad badhte hi chale jaate hai....

    @mirakee @mirakeeworld @writersnetwork @writersbay

    Read More

    Aayina(Mirror)

    ┬ęshrutitripathi