• udit94 5w

    ______________OUR FIRST LED TV________________


    Pitaji ka keypad wala phone jisko koi puchhta tak nhi tha aaj sab uske bajne ka intezaar kar rhe the..
    Maano muddato baad koi bachpan ke bichhde yaar ka kar raha ho.
    Ghar me 4 aur mobile hone ke baad bhi na jaane kyu aur kisne Pitaji ka mobile register karwa diya.
    Aur wo bhi wo jo is keypad wale phone me tha.
    Samsung ke engineer sahab ko aane me 3 din lage.
    Bahattar ghante.
    Aap shayad is dard ko smjh na payen par 3 din se pade TV ko dekh ke ruka bhi nhi jaa rha tha kyunki ham sab TV dekh to rahe the par dekh nhi paa rhe the.
    Ek do dafa mann to kiya ki khud hi pechkas aur plass lekar kaam par lag jayun par fir ye zaalim guarantee warranty ki deewar beech me aa gyi.

    3 din baad engineer sahab ka aise swagat hua jaise sasural me damad ji ka hota hai.
    Daadiji ne to jaise dekhte hi bta diya ki ye inke gaon ka ladka hai.
    Unke hisaab se jo bhi achha kaam karta hai wo unke hi gaon ka hota hai.
    Hamara cylinder wala,
    'Shani dev' chilla kar gate par nimbu mirchi bandhane wala
    Aur
    Saare policewale
    Sab daadiji ke gaon ke hi hain.

    Papa mammi to jaise usi ko apna baccha smjh baithe the.
    Chai aur biscuit to aise tray me laga ke laaye jaise MasterChef me presentation ke marks milne wale ho.
    Par mammi papa apne god liye bacche se tab naraaz hue jab engineer sahab ne khane se saaf inkaar kar diya.
    Covid-19 ke chalte engineer sahab ke haath bandhe the warna GOOD DAY biscuit ko kaun mana karta hai.

    Bina samay barbaad kiye engineer sahab ne apni bike ki chaabi kisi khanjar ki tarah pakdi aur LED ke masoom se carton pe lagi tape ka katal kar dala.
    Papa mammi apne dimag me adoption paper sign kar hi chuke the ki jaise hi dekha ki unka naya baccha unke aankhon ke taare ko kis tarah handle kar rha hai,
    Papa gusse me chillaye,
    "Arre bhai araam se..
    Kaise kaam karte ho"
    (Dono ne kaalpnik adoption paper me aag laga di thi ��)
    Engineer sahab ko koi farak nhi padta.
    Unka to ye din k installation ka छठा TV tha.
    Drill machine se unhone hamari ultratech cement se bani mazboot deewaron me pehle do surakh kiye.
    Us din sach me lag raha tha ki deewaron ke sach me kaan hote hai.
    Fir jab thik unke niche 2 surakh aur kiye to laga ki in deewaron ke kaano ko piercing ka shauk bhi hai.
    Apne saath laye bracket ko deewar me badi nipunta se lagaya.
    Nipunta se mera mtlb hai
    4 baar hathode se thok baja ke.
    Itna maara k bracket ka akaar hi badal diya.
    Lagta hai Engineer sahab Sunny paaji ke bahut bade fan hai
    Wo lohe ko pighala to nahi paye par haan uska akaar zarur badal diya tha.
    Ham sab ki shakal dekh ke engineer sahab ne abki baar hamare aankh ke taare ko araam se uske aasman par sajaya.
    Jab unka kaam ho gya to fatafat apna saara samaan bag me aise daala jaise bachpan me late hone par main apni kitabe bag me bharta tha.
    Kisi bhi naye kharche ko dekh ke, Pitaji ki dil ki dhadkane Dhak Dhak girl Madhuri Ji jaisi ho jaati hai.
    Jaati laxmi unhe zara nhi suhati.
    TV aane ki khushi se zyada khushi pitaji ko is baat ki thi koi installation charges maange bina engineer sahab chale gye.
    Pitaji ne wo black money apni pocket money smjh ke apne pass rakh liye.

    Pritam da ke gaane ko ham sab asliyat me jee rhe the...
    "Berang si thi badi zindagi
    Kuchh rang to bharo".
    Purane TV pe kayi baar chumbakiye totke karne ke baad bhi usne apne rang nhi badle.
    TV par maano by default hi blue light filter lag gya ho.
    Bas farak itna tha ki usme blue light, red light, yellow light har type ka filter laga hua tha.
    Ginti ke sirf 3 rang dikhayi dete the.
    3 saal baad aaj duniya rangeen hui.
    Bhaiya (cousin) ne hamari guhar suni
    Aur unhone ye TV hame bhent kar diya..
    Par ek shart par.
    Ki Daadiji ko Aastha channel dikhaye.
    To ab Aastha channel ko chhod kar
    Baaki sab channel isme chalte hai.


    Papa ke one liner Chandler ke one liner se kam nhi hote.
    Jaise hi TV ki specifications padhi to mere aur chhoti behen ke muh se ek hi baat nikli,
    "Ye TV smart nhi hai"
    Papa : To tum kaunsa smart ho...
    Ham sab chuppi saadh kar baith gye


    Purane TV ka wahi haal hua
    Jo Toy Story me Woody ka,
    Buzz Light year ke aane par.
    Bechare se ek baar puchha bhi nhi gaya ki set-up box ka taar nikale ya nhi.
    Naye TV ke installation hote hi
    Usko set-up box ke taaro se saja diya gaya.

    Ab TV dekhne me krantikari badlaav aaye.
    Subah 6 bje se 9 bje tak Papa aur Ramdev baba Ji ki meeting chalti hai.
    Uske baad chhoti behen ko jhaadu marne me MAZA nhi aata isliye is naye TV par full volume me gaana chala deti hai.
    Jisko sunke pitaji ka BP high ho jata hai
    Aur unke volume kam karne aur chhoti ke volume badhane ke silsile me main aur Daadiji apne number ka intezaar karte hai.
    Raat ko 8 se 11 maataji theatre book kar leti hai.
    Us time to koi ads me bhi channel nhi badalta.
    Din ke mujhe milte hai sirf 50 min.
    Aur wo 50 min mujhse koi nhi cheen skta...
    Kaash main aisa kah skta.
    Par na hi main Shah Rukh Khan aur na hamari life Chak de India.
    (Chak de remote zarur ho skti hai)
    Pen drive laga kar HD me
    Cosmos : A Space Time Odyssey dekhne ka maza hi kuchh aur hai.
    Par ghar wale alag hi prasaran chalu rakhte hai.
    "Ye to English me bolta rehta hai"
    "Iske subtitles on to kar kya bol rha hai"
    "Ab niche subtitle dekhe ya jo TV me dikh rha hai wo dekhe"
    50 min ka show 1½ ghante me dekhne ka hunar jo mujhme aaya hai, wo aap sab nhi smjh skte.

    Itni mehnat karne ke baad kuch samay ka vishram bhi zaruri hai.
    Nhi main apni nhi abhi bhi TV ki hi baat kar rha hu.
    Hamare Mahishmati me, Daddiji ka order Rajmata Shivgami devi ke vachan se kam nhi smjha jaata.
    To TV ke 3 ghante vishram ke bhi tay kiye jaa chuke the.
    Aur main
    Jis hisaab se ghar me sabse kam baal hai, mera role Kattappa jaisa ho gya hai.
    Bas Rajdharm aur anumanti ka paalan karna.
    Ek sabse achha aur asambhav karya jo naye TV ne kiya wo ye tha ki - Saas aur bahu ek hi kamre me baithkar, ek hi TV par, ek hi show dekh rhe the aur dono khush the.
    TV ke karyokram ne ghar ke karyakram pe thoda viraam lagaya.
    Aur yahan main bhi ek viraam lagana chahunga par ek vichar ke saath -
    Maataji ke TV ke samay me remote ko haath lagane par Maataji Danny ban jati hai.
    (Jisko samajh nhi aaya wo bio me link pe click kare).

    ©udit94

    #ucomic

    Writing style inspired by "Dilli Darbar"
    A book by Satya Vyas

    Read More

    OUR FIRST LED TV

    ©udit94