Grid View
List View
  • satyamangala 25w

    ಜೀವ ದರ್ಪಣ

    ಜೀವಾಕರ್ಷವೇ ಹೂವಾಗುವ ಘಳಿಗೆಯಲಿ
    ಭಾವೋತ್ಕರ್ಷದ ಬೆಳಕಾಗಿ ಬಂದೆ
    ಸಿರಿಯಾದೆ ಬಿಡುಗಡೆಗೆ ದುಡಿದವರಿಗೆ
    ವರದಂತೆ ದುಡಿದೆ ಸರಳತೆಗೆ
    ಮೆರೆವ ಭಾರತದ ಬಾಪುವಿನ
    ನೊಗ ಹೊತ್ತ ಕಾಯಕ ಯೋಗಿಯೇ

    ವಿಪುಲವಾಗಿಹ ದಾಹ ಶರದಿಯಲಿ
    ತಣ್ಣೆಳಲ ತಂಬೆಲರ ಕಣಿವೆಯ ತೆರೆದೆ
    ಕಿರಣದುದಯದ ಕಾರಣದ ಬೆಳಕಿಂಗೆ
    ತೈಲದಂತುರಿವ ಯೋಜನೆಯ ಕತೃವಾದೆ

    ಅರಿವನ್ನು ಅನವರತ ಪೂಜಿಸಿದ ಮೌನಿಯೇ
    ಧ್ಯಾನದ ಎಚ್ಚರವನ್ನು ಅಚ್ಚರಿಯಲಿ ಕಂಡಿರಿಸಿದೆ
    ಅಕ್ಷರವ ಹಂಚುವ ದಯೆಯ ಕಾರಣಿಕವಾಗಿ
    ಆಗಸದ ತುಂಬೆಲ್ಲ ಹಕ್ಕಿ ಹಾರುವ ತೆರದಿ
    ಹಾರುವ ಹಕ್ಕಿಗಳ ತಾಯಾಗಿ ತಂದೆಯಾಗಿ
    ಮನದೊಳಗೆ ಕುಸುಮಿಸಿದೆ
    ಎಲ್ಲಾ ಬೇಕೆನುವವರ ಮಧ್ಯೆ
    ಬೇಡ ವೆನ್ನುವ ದಯಾಳುವೆ

    ಅನ್ನದ ರಹದಾರಿಯನು ಹಸಿವಿನ ಕೋಣೆಗಳನು
    ಕ್ರಮಿಸಿ ಕ್ರಮಗೊಳಿಸುವ ಅಭಿಯಂತರನಾದೆ
    ಹೂವಿನ ಹಾಡನು ಕೇಳುವ ಸೂಕ್ಷ್ಮ ಸಿಂಧುವೆ
    ಹಾಡಿನೊಳಗಣ ತಾಳಲಯ ಭಾವಕ್ಕೆ
    ಉಸಿರಿನೊಳಗಣ ತೇಜವನು ಶೃತಿಗೊಳಿಸಿದೆ

    ಬರೆಯುವುದನು ಬದುಕಿದೆ
    ಬದುಕಿನಂತೆ ಬರೆದೆ
    ಎವೆತೆರೆವ ಗುಬ್ಬಿ ಗೊರವಂಕಗಳಿಗೆಲ್ಲಾ
    ಕೋಗಿಲೆ ಮರಿದುಂಬಿಗಳನೆಲ್ಲಾ
    ತನ್ನೆದೆಯನೆ ಗೂಡಾಗಿಸಿದೆ
    ವಸಂತಕಾಲವನೆ ಕಾಯದೆ ವಸಂತವನೆ ಸೃಷ್ಟಿಸಿದೆ

    ಮಾತು ಸೋತಾಗ ಮೌನವನೆ ಮಿಡಿಸಿದೆ
    ಅಡಿಗಡಿಗು ಎಚ್ಚರವನೆ ಚಿಗುರಿಸಿದೆ
    ಸಂತೋಷವನು ಆನಂದದ ಎತ್ತರಕೆ
    ಉಲ್ಲಾಸವನು ಉತ್ಥಾನಕ್ಕೆ ದಾಟಿಸಿದೆ
    ಉದಯಿಸಿದೆ ಉದಯಗೊಳಿಸಿದೆ

    ಕಾರ್ತಿಕ ದೀಪದಂತೆ ಮುಗಿಲನಾವರಿಸಿದೆ
    ಮಿತಿಯ ಉಜ್ವಲಗೊಳಿಸೆ ಬಂಧುವಾದೆ
    ಆತ್ಮ ಹುರಿಗೊಳ್ಳುತಿದೆ ನಿನ್ನಾತ್ಮ ದರ್ಶನಕೆ
    ಪದ ಸೋಲುತಿವೆ ಜೀಯ ನಿನ್ನ ಗುಣ ಗ್ರಹಣಕ್ಕೆ
    ನಿನ್ನ ಪದತಳದಲ್ಲಿ ಬಿರಿಯುತಿಹ
    ಮೊಗ್ಗೆಂದು ಗಣಿಸಿ ಕಾಯಕವನಿತ್ತ ಜೀವ ದರ್ಪಣವೆ
    ವಂದಿಸುತ ತಲೆಬಾಗಿ ಮಣಿವುದೆನ್ನ
    ಕಾಯಕವು ದಿನ ದಿನವು.......
    --------------------
    : ಡಾ.ವೂಡೇ ಪಿ ಕೃಷ್ಣ ಸರ್ ಅವರ ಕುರಿತು ಬರೆದ ಪದ್ಯ

    - ಸತ್ಯಮಂಗಲ ಮಹಾದೇವ

  • satyamangala 29w

    Word Prompt:

    Write a 8 word short write-up on Chaos

    Read More

    ಸತ್ಯ

  • satyamangala 29w

    ವಿರಾಮ

    ಊಟಕ್ಕೆ ಜೀರ್ಣವಾಗುವ
    ಕನಸು ಬಿತ್ತು
    ಕನಸಿಗೂ ಹಸಿವಿತ್ತು
    ನಿತ್ರಾಣವಾದ ಹೊಸತನವಿತ್ತು
    ಅನ್ನಕ್ಕೆ ವಿರಾಮವಿಲ್ಲ
    ಶಕ್ತಿಯಾಗುವ ರೂಪಾಂತರಕೆ
    ತನ್ನ ಪ್ರಯಾಣವ ಬೆಳೆಸಬೇಕು

    ಉಸಿರಿಗೆ ಜೀವವಾಗುವ
    ಅನಿವಾರ್ಯತೆ ಇದೆ
    ಮನುಷ್ಯನೋ ಪ್ರಾಣಿಯೋ
    ಕ್ರಿಮಿ ಕೀಟವೋ ಯಾವ ದೇಹವೋ
    ಪಡೆದ ಎಲ್ಲವನ್ನು ಕಳಚಿ
    ಹೊರಡಲು ತಯಾರಾಗಬೇಕು

    ಹಾರಲು ಈಜಾಡಲು
    ಕೂತು ಕೂತು ಕೊಳೆಯಲು
    ಬಂಡಯಂತಿರಲು
    ಅನಂತಕೂ ಆವರ್ತವಿದೆ
    ಕಾಲಾಂತರದ ಕಾಲಪಕ್ಷಿಯಾಗಲು
    ಜಡವಾಗುವ ಅವಶ್ಯಕತೆಯಿದೆ
    ಬೇಕು ಬೇಡಗಳ ಬಿಟ್ಟು ನಿರಾಳವ
    ತಬ್ಬುವ ಏಕಾಂತಕ್ಕೆ ಜಾರಬೇಕಿದೆ


    ಕೀರ್ತಿಗೆ ಅವಕಾಶಗಳ ದಾಟುವುದಕೆ
    ಕಲಿಕೆ ಬೇಕಿದೆ ಅಪಮಾನಗಳಲ್ಲೂ
    ಕಿರೀಟವಿಲ್ಲದ ರಾಜನಾಗುವುದಕೆ
    ಸಿಂಹಾಸನಗಳಿಲ್ಲದ ರಸಿಕನಾಗುವುದಕ್ಕೆ
    ಮಾನವತೆಯ ಅಮೃತ ಬೇಕಿದೆ
    ಸಾಮಾನ್ಯನಾಗುವುದಕ್ಕೆ
    ಮತ್ತೆ ಮತ್ತೆ ವಿರಾಮವೊಂದು ಬೇಕಿದೆ
    ಮನುಷ್ಯನಿಂದ ಮಾನವತೆಗೆ ಏರುವುದಕ್ಕೆ.


    - ಶ್ವೇತ ಮಂಡ್ಯ

  • satyamangala 29w

    ಬೆಳದಿಂಗಳು

    ಹೆಜ್ಜೆಮೇಲೆ ಹೆಜ್ಜೆ ಇಟ್ಟು ಬರುವಾಗ
    ಹಂಸದಂತೆ ಬಂದಳು
    ಚಂದಿರನ ನಾಚಿಸುವಾ ಬೆಳದಿಂಗಳು

    ಕೇಶರಾಶಿ ಹರಡಿರಲು ಎದೆಮೇಲೆ
    ಸೂಜಿ ಮನೆಯ ಮೊಗ್ಗಿನಂತೆ ರತಿ ಲೀಲೆ

    ಸೀರೆಯಲಿ ನೀರೆಯನು
    ನೋಡುತಲಿ ಕಣ್ಣುಗಳು
    ರೆಪ್ಪೆಬಡಿದು ನಿಂತವು
    ನಾಚಿ ಮೈಯ ಮರೆತವು

    ತುಟಿಯ ರಂಗು ಕಂಡ ತುಟಿಯು
    ಕಟಿಯ ಸಂಗ ಬಯಸಿತು
    ರಂಗನಿಟ್ಟು ರಂಗೋಲಿಗೆ
    ಪ್ರೇಮದಂತೆ ಸೆಳೆಯಿತು

    ಮೂಗುತಿಯಲಿ ಪಂಚಪ್ರಾಣ
    ಕಂಡ ಉಸಿರು ಅರಳಿತು
    ಧಾವಿಸುತ ಓಡೋಡಿ
    ಬೆರೆಯಲು ಮನ ಕಾಡಿತು

    ಬೆರಳುಗಳಲಿ ನಾದ ವೇದ
    ಅವಳ ಮೈ ಸೋಕಲು
    ಮೋಡ ಬಿಟ್ಟು ಹೊರಟಂತೆ
    ಮಳೆಯ ಜತನ ವಸುವಿಗೆ
    ಅವಳೇ ಅವನ ಭೂಮಿಕೆ

    ಬಾಹುಗಳು ಹಾತೊರೆದವು
    ಅವಳ ತೋಳ ತೆಕ್ಕೆಗೆ
    ತಬ್ಬಿ ಹಿಡಿದು ಚುಂಬಿಸಲು
    ಮೋಹ ಮಾಯೆ ಮೆರೆಸಲು

    ಮಿಲನ ಎಂದೋ
    ಮೋಹ ಮಾತ್ರ ಮಾಧವನನು ಅರಸಿದೆ
    ರಾಧೆಗೊಂದೇ ಕನಸು
    ಮಿಕ್ಕಿ ಮೀರಿ ಉಳಿದಿದೆ.

    - ಸತ್ಯಮಂಗಲ ಮಹಾದೇವ

  • satyamangala 32w

    By unknown writer

    Read More

    ಅಗ್ನಿ ಕುಸುಮ

    ಹೂವೊಂದು ತೊಟ್ಟು ಕಳಚಿ
    ನೋವಿನಿಂದ ಸಪ್ಪೆಮುಖ ಮಾಡಿ
    ಹಗುರಾಗಿ ನೆಲಕೆ ಬೀಳುವಾಗ
    ಭಾರವಾದ ಹೃದಯದಲ್ಲಿ
    ಗಾಯಗೊಂಡ ಪ್ರೀತಿ ಪಿಸುನುಡಿಯುತ್ತದೆ
    ಕಲ್ಲು, ಕಟ್ಟಿಗೆ ,ವಿಷಯುಕ್ತ ಉಗುರುಗಳು
    ಮುಖವಾಡದ ಬೆರಳುಗಳು
    ಇದ್ದಷ್ಟು ದಿನ ತಪ್ಪಿಸಿಕೊಂಡು ಬಂದ
    ಹೋರಾಟದಲ್ಲಿ ಬೆಂದು ಬೆಂದು ಬಾಡಿ ಬಿದ್ದಿದ್ದೇನೆ
    ಅಗ್ನಿ ಕುಸುಮ ಮಾತನಾಡುತ್ತಿದೆ.


    ಅಕ್ಕ ಸೀತೆ, ನನ್ನ ಅತ್ತೆಯ ಮಗಳು ಅಹಲ್ಯೆ
    ಗುರುಪುತ್ರಿ ದ್ರೌಪದಿ, ತಾರೆ ಮಂಡೋದರಿ
    ಈ ನನ್ನ ಸಂತಾನದ ಹಣೆಪಟ್ಟಿಗಳು
    ಮಣ್ಣು ಸೇರಿ ಮೊಳೆತು ಹೂವಾಗುವ ನನಗೆ
    ರಂಗು ನೀಡಿದ ಆ ಆತ್ಮಸಾಕ್ಷಿಗೆ
    ಯಾವತ್ತೂ ಭಂಗ ಬಂದಿಲ್ಲ
    ಮುಖಗಳೇ ಇಲ್ಲದ ಮುಖವಾಡಗಳು
    ಕುಣಿ ಕುಣಿದು ನರ್ತಿಸಿ
    ತಮ್ಮ ತಲೆಯಮೇಲೆ ತಾವೇ ಕೈ ಹೊತ್ತು
    ಭಸ್ಮವಾಗುವ ಕಾಲ ಬರಲಿಲ್ಲ
    ನನ್ನ ಸಂತಾನದ ಕರುಳ ನೋವು
    ಅಗ್ನಿಯಾಗಿ ಉರಿಯಲಿಲ್ಲ
    ಕೆಂಡವಾಗಿ ಕಾಯಲಿಲ್ಲ
    ಬೂದಿಮಾಡುವ ಹುನ್ನಾರಗಳಿಗೆ ಭಯಪಡಲಿಲ್ಲ

    ಗಂಧದರಮನೆ ಕಟ್ಟಿ
    ತಳಿರು ತೋರಣ ಒಟ್ಟಿ
    ಶಯನದ ಶೃಂಗಾರ ಮಾಡಿ
    ಪಟ್ಟ ಕಿರೀಟಗಳ ಆಸೆ ಹೊತ್ತು
    ಛತ್ರಿ ಚಾಮರಗಳ ಬೀಸಿದಾಗ
    ಆಸೆಗಳ ಕಮಟುವಾಸನೆಗೆ ನಾನು ಕುದ್ದು ಹೋಗಿದ್ದೇನೆ
    ನನ್ನ ಕುಲದ ಮೆರವಣಿಗೆಯಲ್ಲಿ
    ನಾನು ಬೆಂದು ಭಸ್ಮವಾಗಿದ್ದೇನೆ
    ಆದರೆ ನಾನು ನಾನಾಗೇ ಅಗ್ನಿ ಕುಸುಮವಾಗಿದ್ದೇನೆ
    ಬೆಂದಿದ್ದೇನೆ ಹೊರೆತು
    ಕಾಣದ ಕೈಗಳಲ್ಲಿ ಅರಳಲಿಲ್ಲ
    ಈ ಹಠ ಈ ಹೋರಾಟಕ್ಕೆ
    ಮತ್ತೆ ನನ್ನ. ಬಲವನೆಲ್ಲಾ ತುಂಬ ಬೇಕಿದೆ
    ಉರಿಯಬೇಕಿದೆ ಶತಮಾನಗಳ ಅಗ್ನಿ ಕುಸುಮವಾಗಿ...


    ‌ ‌‌ - ಶ್ವೇತ ಮಂಡ್ಯ

  • satyamangala 32w

    ಅಗ್ನಿ ಕುಸುಮ

    ಹೂವೊಂದು ತೊಟ್ಟು ಕಳಚಿ
    ನೋವಿನಿಂದ ಸಪ್ಪೆಮುಖ ಮಾಡಿ
    ಹಗುರಾಗಿ ನೆಲಕೆ ಬೀಳುವಾಗ
    ಭಾರವಾದ ಹೃದಯದಲ್ಲಿ
    ಗಾಯಗೊಂಡ ಪ್ರೀತಿ ಪಿಸುನುಡಿಯುತ್ತದೆ
    ಕಲ್ಲು, ಕಟ್ಟಿಗೆ ,ವಿಷಯುಕ್ತ ಉಗುರುಗಳು
    ಮುಖವಾಡದ ಬೆರಳುಗಳು
    ಇದ್ದಷ್ಟು ದಿನ ತಪ್ಪಿಸಿಕೊಂಡು ಬಂದ
    ಹೋರಾಟದಲ್ಲಿ ಬೆಂದು ಬೆಂದು ಬಾಡಿ ಬಿದ್ದಿದ್ದೇನೆ
    ಅಗ್ನಿ ಕುಸುಮ ಮಾತನಾಡುತ್ತಿದೆ.

    ಅಕ್ಕ ಸೀತೆ, ನನ್ನ ಅತ್ತೆಯ ಮಗಳು ಅಹಲ್ಯೆ
    ಗುರುಪುತ್ರಿ ದ್ರೌಪದಿ, ತಾರೆ ಮಂಡೋದರಿ
    ಈ ನನ್ನ ಸಂತಾನದ ಹಣೆಪಟ್ಟಿಗಳು
    ಮಣ್ಣು ಸೇರಿ ಮೊಳೆತು ಹೂವಾಗುವ ನನಗೆ
    ರಂಗು ನೀಡಿದ ಆ ಆತ್ಮಸಾಕ್ಷಿಗೆ
    ಯಾವತ್ತೂ ಭಂಗ ಬಂದಿಲ್ಲ

  • satyamangala 34w

    ಯಾರು ?

    ಚರ್ಮ ಸುಲಿದು ಕರುಳ ಬಿಡಿಸಿ
    ಮಾಂಸ ವಿಂಗಡಿಸಿದ ಕಟುಕ
    ಗಲ್ಲಾಪೆಟ್ಟಿಗೆಯಲ್ಲಿದ್ದಳು ಲಕ್ಷ್ಮಿ
    ರಕ್ತಸಿಕ್ತ ಕೈಗಳು ಮುಟ್ಟುತ್ತವೆ ಅವಳನ್ನು
    ನೋಟಿನ ರೂಪವಾಗಿ ಅವಳು ಓಡಾಡುತ್ತಲೇ ಇದ್ದಾಳೆ
    ಜೇಬಿನಲ್ಲಿಳಿದು ಹೃದಯದಲ್ಲಿ ಆಸೀನಳಾದಳು
    ಮುಟ್ಟಿದವನ ಅವಳು ಕೇಳಲಿಲ್ಲ?
    ನೀನು ಕಟುಕನೇ ?
    ನೀನು ಮಾಂಸಾಹಾರಿಯೇ ?
    ನೀನು ಯಾರು ಎಂದು !


    ©ಸತ್ಯಮಂಗಲ ಮಹಾದೇವ

  • satyamangala 34w

    ಗಾಂಧಿ ಸತ್ತಿಲ್ಲ

    ಕಟ್ಟೆಯ ಮೇಲೆ
    ಹಟ್ಟಿದನ ಕೊಟ್ಟಿಗೆ ಸೇರುವಲ್ಲಿ
    ಒತ್ತೊತ್ತಿಗೆ ಹೆಣೆದ ಮಂಕರಿಯ ಮುಂದೆ
    ಮಣಬಾರದ ಚಿಂತೆಗಳ ಹೆಗಲೇರಿಸಿ ಕೂತ
    ಅಜ್ಜನ ಹಣೆ ಮೇಲೆ ವಸಂತದ ಹೆಣಗಳ ರಾಶಿ
    ಹನಿ ಹನಿಯಾಗಿ ನೆಲಕೆ ದುಮುಕುತ್ತವೆ
    ಬಾಳ ಝರಿಯಾಗಿ ಬಳಲದೇ ಬಳುಕುವ ಹುಮ್ಮಸ್ಸಲ್ಲಿ
    ಬಾಲನಾಗಿ ನಿಂತು ನೋಡುತ್ತೇನೆ
    ನನ್ನ ಗಾಂಧಿ ಸತ್ತಿಲ್ಲ

    ಸಿನಿಮಾ ಟಾಕೀಸುಗಳ ಮುಂದಿನ ಬೆಂಚುಗಳಲ್ಲಿ
    ಮೋಟು ಬೀಡಿ ಸೇದಿ ನಾಳೆಗೆ ಇರಿಸುವವನಲ್ಲಿ
    ಟಿಕೇಟು ಕೊಟ್ಟು ಚಿಲ್ಲರೆ ಬರೆದುಕೊಡುವವನ ಎದೆಯೊಳಗೆ
    ತೂಕ ಹಾಕಿ ತೂಕ ಬಚ್ಚಿಡುವ ತೂಕವಿಲ್ಲದವರ
    ತೂಕದ ಬೊಟ್ಟುಗಳಲ್ಲಿ
    ಅಳೆದು ಮಡುಚಿ ಕತ್ತರಿಸಿ ಒಲಿಯುವ ಸಿಂಪಿಗನ
    ಕತ್ತರಿಯ ನೇರ ನಡವಳಿಕೆಯಲ್ಲಿ
    ಗಾಂಧಿ ಸದಾ ನೇಣುಗಂಬಕ್ಕೆ ಏರುತ್ತಲೇ ಇದ್ದಾನೆ.

    ಕೋರ್ಟುಗಳ ನ್ಯಾಯಾಧೀಶರ ಹಿಂದೆ
    ಪೋಟೊದಲ್ಲಿ
    ಪೋಲಿಸ್ ಠಾಣೆಯ ಲಾಠಿ
    ಬಂದೂಕುಗಳ ಜೊತೆಯಲ್ಲಿ
    ಆಸ್ಪತ್ರೆಯ ಗೋಡೆಗಳ ಮೇಲೆ
    ನಿಂತರೂ ನಿಲ್ಲದ ಹಾಗೆ
    ಕೂತರೂ ಕಾಣದ ಹಾಗೆ
    ನಿಂತೇ ಇರುವ ಮೋಹಕ ನಗು
    ಕೂರಲಾಗದ ವ್ಯಥೆಯ ಚರಕಸಂಹಿತೆ
    ಗಾಂಧಿ ಕುಳಿತುಕೊಳ್ಳಲಾಗದ ಚಡಪಡಿಕೆ ಮಾತ್ರ....


    ರಾಷ್ಟ್ರಗೀತೆಯ ಹಾಡಿಗಾಗಿ
    ದೇಶದ ಅಭಿಮಾನಕಾಗಿ
    ನೆನೆವ ನಿನ್ನ ಮಾತಿಗಾಗಿ‌
    ಒಂದು ದಿನ‌ ಮಾತ್ರ ನೆನಪಿಸಿಕೊಳ್ಳುವ
    ನನ್ನಂತವನಿಗೂ
    ತಿಂಗಳ ಕೊನೆಯಲ್ಲಿ ನಗುತರಿಸುವ
    ಸಂಬಳದ ನೋಟುಗಳಲ್ಲಿ
    ಮಾಸಲೇ ಇಲ್ಲ ಗಾಂಧಿ‌ ನಿನ್ನ ನಗು.....

    ವಿನಿಮಯ ಮಾಡಲಾಗದ ನಿನ್ನ
    ವಿಲೇವಾರಿ ಮಾಡುವ ಈ ಸಂತೆಯೊಳಗೆ
    ನಾನೂ ಇದ್ದೇನೆ
    ವೃತ್ತಗಳಲ್ಲಿ ಪ್ರತಿಭಟನೆಗಳ ನೋಡಿ ನೋಡಿ
    ನೀನು ಸುಮ್ಮನೆ ಕೂತಿದ್ದೀಯೆ
    ಸುಮ್ಮನಿರುವುದು ಸಾಧ್ಯವೇ ?
    ಪದ್ಯ ಬರೆಯುವಾಗ ನಾನು ಮತ್ತೆ ನಿನ್ನ
    ನೆನಪಿಸಿಕೊಳ್ಳಬಹುದು ಅಷ್ಟೆ
    ಗಾಂಧಿಯಾಗುವ ಘಳಿಗೆ ಯಾವಾಗ ಬರುತ್ತದೆಯೋ
    ಕಾಯುವ ಕಾಲದ ಕಣ ನಾನು
    ಮುನ್ನಡೆಸಿದ ಮಹಾ ಚೇತನ ನೀನು.....

    - ಸತ್ಯಮಂಗಲ ಮಹಾದೇವ
    ©satyamangala